【宇宙核心外圍嘅一篤屎】
有啲老闆同埋主管，係完全唔知外界點樣評論佢哋公司，因為呢班友一直都係坐井觀天，自我感覺良好。
HR姐姐:「喂聶生，有冇Project Manager? 8年經驗，管過國內工廠，Engineering Degree......(下刪百字)」
我:「哦，好呀，我搵一搵再call返你。」
收線之後我打咗畀5個求職者，反應如下:
A先生:「嘩，呢間公司，唔做喇。」
B先生:「佢哋仲請緊人呀? 半年前已經請緊喇喎。」
C先生:「我上年自己apply過啦，上過去見，個部門主管黑口黑面，嫌三嫌四。」
D先生:「我朋友做過啦，做咗一個禮拜頂唔順走咗。」
E先生:「我有同事喺呢間嘢出嚟，話好惡頂，同行嗰班唔會做架喇。」
個名臭到成篤屎咁既? 打返畀個HR旁敲側擊下先:「咦，呢個位請咗好耐嗱? 有求職者話上年見過喎，係未請到人吖，抑或啱啱又走咗呢?」
HR姐姐尷尷尬尬咁回答:「其實請咗成年，個部門主管有佢自己嘅要求，有時見完個求職者，佢又會自己問行家攞料，總之見嚟見去都唔啱，我都提過佢市場上已經冇乜人揀。」
呢啲「揀老公揀老婆Job」用半年、一年，或者兩年都請唔到人嘅case，我見過，我真係見過，其實佢哋就算中途請到，嗰個人都會好快走，所以周不時又會見到呢個位喺求職網出現，真係要寫個「伏」字，有伏個「伏」。
遇著咁嘅情況，HR其實係最痛苦，你諗下，招聘網站啲廣告絕對唔平，仲要不斷登完再登，最慘係個部門主管唔知自己有問題，不斷催促要人，HR自己搵又有，叫Agency幫手搵又有，但俾親cv個主管都話唔啱。
形成呢種不良現象，最大原因係個主管(部門經理或者老闆)食古不化，自己喺公司也文也武，就以為間公司係全宇宙核心，喂大佬，你公司係Apple、Facebook、摩根史丹利之流，我都唔怪你，最慘你唔係吖嘛，呢啲咪係典型嘅「俾得百二蚊，又要李嘉欣」囉。
其實一間公司嘅同一個職位不斷喺招聘網站出現，形象上絕對百害而無一利，你當啲求職者傻架咩，你班行家見到都夠晒樣衰啦，請咗成年都未請到人喎，而且每個行頭嗰班人都會討論，上過去見工又好，曾經做過又好，啲消息傳得好快，係人都知呢間公司或者呢個部門難頂啦。
問心嗰句，係咁出招聘廣告又點啫，好嘅cv一早收晒啦，個個月係咁登埋同一隻稿，收嘅cv只會一蟹不如一蟹，根本係惡性循環，俾你有一日請到，咪又係退而求其次，做得長先再講啦！所以奉勸呢班坐井觀天嘅高層，伸個頭出去睇睇，你公司唔係宇宙核心呀，你喺屎坑睇世界咋。
=============================
【老餅開IG】
「辦公室日報」今日開咗IG: officedailyhk，目的係想更多人睇到專頁內容，特別係一啲求職陷阱嘅主題，如果你哋都有IG，希望大家唔好吝嗇，Follow我吖！🙏
Search